首页 > 新闻 > 香港 > 正文

揽炒派鬼打鬼:"35+"有×用

激进分子矛头直指鸽讼党 戴妖图补镬俾人嘘

人称"戴妖"嘅戴耀廷出狱后大张旗鼓咁搞揽炒派初选,点知公布初选机制冇耐已爆出一堆内部矛盾,外人除咗食到一地花生壳,更睇尽揽炒派反民主嘅本质。近日,戴妖声称为"凝聚"唔同派系,要大家签署由佢草拟嘅所谓揽炒协议,但后来又改口话唔会傻到畀政府有DQ嘅理由,决定靠个"信"字唔使"签约",搞到一班激进揽炒派好不满,仲自行公开签咗个"抗争派立场声明书"。

噚日班激进揽炒派就点名话,除咗鸽党、街工同社民连,大部分初选参与者都签咗声明,仲喺facebook写信质问"初选筹组平台",系咪唔签声明嘅政党就可以无视初选结果?可怜"戴妖"黔驴技穷,唯有话佢会用人格担保唔签协议嘅党派,口头上都同意内容喎,令网民都"赞"佢:"戴教授愚民手法层出不穷,令人叹为观止"。

揽炒派怕初选沦议席"分饼机"

由戴妖同揽炒派区诺轩牵头搞嘅所谓"民主派35+公民投票",未开始已经丑闻不断。发起"抗争派立场声明书"嗰班激进揽炒派,讲到目前至少有39位初选参与者或政党签署声明,但有啲党派就仲未签,又话如果唔系成个揽炒派都同意初选嘅共同纲领,恐怕初选只会沦为议席嘅"分饼机",质问搞初选嘅戴妖同区诺轩,系咪唔签声明就可以无视初选结果同共同纲领喎。

揽炒派内讧互批"唔齐心"

讲到明唔参加初选嘅"全民参政"姚冠东近日发难,贴出日前揽炒派就委任张举能为终审法院首席法官嘅投票结果,唔计自称中间派嘅医学界议员陈沛然,只有5名揽炒派议员反对政府议案,另外13票弃权或缺席,最令人讶异嘅系5名揽炒派功能界别议员都投票支持。姚冠东嬲到话:"你话做乜×吖!"

已退出公民党同"人民力量"嘅前议员谭香文亦转载结果:"要踢走佢地(哋)"。"热血公民"郑松泰更开post抽水:"如果『弃权』等于『反对』,点解上次国歌法我要一票独投反对呢......35+有咩用?"

咁黄丝又点睇?"Stephen Yeung"就话:"你睇下(吓)班所谓泛民功能组别,随时反转猪肚。另外仲有弃权同缺席×,真心69+都冇×用。""Bonnie Pan Pang"就同戴妖讲:"戴教授,刚刚过去在立法会张举能法官的投票情况,完全体现到『泛民』极有可能过桥抽板,一个极有『政治色彩』嘅法官将被推选为首席,『泛民』竟然有人支持,而民主党及部份(分)公民党员只是弃权,连表态嘅勇气都欠缺,如日后要哩(呢)班人齐心35+是成疑"。

"Lok Chow"就唔接受戴妖同区诺轩嘅讲法:"讲真,地区直选有党派唔跟statement,功能组别更系重灾区,教育界唔初选,文体(体艺文化界)就直头有人帮人宣布唔选,点令人相信机制?""Fat Po"就问:"如果签张纸可以令大家舒服,点解唔做?又系你话要互信,但系你净系叫人信你,有无谂过点样令人信你?"

为咗应付"信任"危机,戴妖扮可怜搞众筹嚟拆局,点知对方步步进迫,戴妖今次唯有用自己人格嚟担保,话大家日前已经喺会议中用"口头方式"达成揽炒协议,如有争议可搵参与协调嘅人做证:"我希望大家能相信我会是一名诚实的证人去见证这协议的内容是甚么。"

区诺轩亦扑出嚟帮戴妖解围,声称"就算所有人都联署签纸,只要有人到时反悔,除了谴责,根本无法阻止",要真正揽炒应该着力宣传,等选民敦促候选人揽炒喎。讲到咁,唔知班"同路人"又点睇呢?

来源:文汇报