首页 > 新闻 > 香港 > 正文

街工表明唔跟大队 网民批唔尊重初选

立法会选举临近,今次揽炒派嘅策略就系向"同路人"埋手,以"大局为重"嘅名义搞初选,实质就系想吓走小党派减少竞争。不过,噚日街工就率先表明"唔跟大队",仲"义正词严"咁话每个人都有参选同被选权,所以即使佢哋初选落败都会照派人出选,仲讲明现任议员白头佬(梁耀忠)会退居名单第二位,帮现任街工主席卢艺贤"抬轿"。有网民就细数白头佬多次调转枪头打自己人嘅事迹,闹爆佢唔尊重"民主派初选",又揶揄靠佢"抬轿",街工一定搭沉船。

被闹"逃兵忠" 届届混饭吃

现年67岁、一头银发嘅白头佬其实系今届议会资历最深嘅议员,但就甚少跟住班激进揽炒派议员搞乱会议,喺一堆黑衫嘅"街头抗争者"里面,亦几乎冇见过咁标志性嘅白发,所以佢实在冇乜名气。不过,佢4年前放弃主持立法会主席选举嘅权利,将主持之位让咗畀议会资历第二深嘅经民联石礼谦,结果冇DQ到建制派嘅候选人,搞到被网民闹爆系"逃兵忠",佢亦自此"一举成名"。

睇住白头佬直播话要参选下届立法会,一班揽炒派嘅网民即刻火滚,好似"CalvinKevin Li"就话:"白头佬出卖香港人,有主席唔做双手奉送比(畀)『保皇党』!""May Ng"亦非常不满:"逃兵无耻白头忠,亏你厚颜无耻重(仲)要继续参选""Connie Leung"亦好嫌弃咁话:"梁耀忠退位让贤啦!有事龟缩,冇事靠边站曝光擦(刷)存在感,一无事(是)处,身为劳工团体,连自己劳资关系亦一团糟,介介(届届)混饭食,失礼『泛民』!"。

帮灵童"抬轿" 或变"搭沉船"

除咗白头佬,网民亦对排名单首位嘅卢艺贤非常不满,facebook专页"每人追击梁耀忠"就搵返卢艺贤前年嘅专访,发现佢当年讲过愿意喺社交网络媒体方面支援白头佬:"我就系佢分身,我就系在线嘅梁耀忠!"

听到白头佬要为佢嘅灵童转世"抬轿","Gino Wong"就好担心:"抬轿定死亡之吻?""何文驹"就问:"知唔知咩叫搭沉船?""Simon Tang"亦揶揄:"唔系拖一旧铅dum(揼)落水咩?"

批街工唔跟队背弃"同路人"

不过,更多网民批评街工唔跟队、背弃"同路人"嘅初选协议,"Pak Yu Wong"就踢爆:"白头忠一次新西初选会议都无出现过""Tony Chan"就话:"你们是否说明不尊重市民意见?那你参加初选为咩?""Andrew Chan"就点出事实:"白头佬但求保住街工佢自己份粮至有着(着)落。""Brandon Yau"就猜测:"呢个好笑:未必跟初选,意思系咪初选肥仔贤(卢艺贤)输,咁到正式选时白头忠排第一?"

牵头搞初选嘅戴耀廷傍晚亦开post与街工隔空驳火:"我之前说不会要求各参与初选的名单签署协议,我再次强调这并不代表协议不存在。上面的协议是所有参与协调的各方的共识。若不愿遵从大家已达成的协议,应不可参与初选。""Wong Lee"就嫌戴耀廷唔敢开名闹白头佬:"想整死边个呀快d(啲)讲啦,唔洗(使)搞咁多屎棍嘢"。

来源:文汇报