首页 > 新闻 > 香港 > 正文

"独素"割席 批扮大台鎅票

戴耀廷以为自己可以做揽炒派"共主",但喺选举当前,万情难全,所谓昔日嘅兄弟都冇面畀!"民主动力"近日公布咗揽炒派嘅初选名单,仲为下月嘅"全港初选"众筹,不过有关初选嘅内讧丑闻愈嚟愈多,近日仲有唔少"同路人"摆街站呼吁市民"反对民主派初选",公开批评"民主动力"同人称"戴妖"嘅戴耀廷无权扮大台,搞到昔日一齐"抗争"嘅兄弟都即刻喺facebook割席,将揽炒派"兄弟爬山,各自努力"嘅精神发挥得淋漓尽致!

揽炒派组织"学生历量"日前摆反揽炒派初选街站,话"民主派"唔应该有大台,又话接触过某啲参加初选嘅"本土派"候选人,发现佢哋都只系因为觉得"民意希望咁做"先报名,所以只要多啲市民出声反对初选,就可以令更多"本土派"候选人杯葛选举喎。

嚟撑场嘅就有想参与立法会新界西直选嘅屯门区议员巫堃泰,佢话非常质疑初选嘅民意认受性,又称主办方至今只筹到70万,只达众筹目标嘅五分之一,所以其实唔多人支持初选喎。想参选新界东嘅"全民参政"姚冠东亦有现身,声称人人都有参选权,选民都有能力、有自由去判断同选择心仪嘅参选人喎。佢哋仲话,预咗反对初选就会畀人闹鎅票,又反问:"点解唔系『泛民』鎅紧本土派啲票?"

不过,经常同巫堃泰出席非法集会"抗争"嘅油尖旺区议员陈嘉朗就同自己人割席,仲喺facebook发声明话:"对唔住,我唔同意。郑重宣布(布),所有不参与初选的2020年立法会换届候选人,我一概不会提供支持同意书。"

网民"Bo Sau See"好可惜咁问:"兄弟都冇面俾(畀)?"陈嘉朗就"大义灭亲"咁话:"各自努力吧,但我真的不同意,无办法。""Carina Chong"就揶揄:"『老曱甴』捉虫,养左(咗)班无良心既(嘅)『曱甴』,年轻人要上位啦,咪阻住地球转啦!买定花生等睇戏!"

戴自high最识嘢 唔听话禁初选

其实,由开始搞所谓初选以嚟,"戴妖"对"同路人"嘅指责都司空见惯,佢噚日就喺facebook隔空发炮,话尊重唔参加初选嘅人,亦冇人有权阻止佢哋,但就暗寸巫堃泰同姚冠东:"有些人仍天真地以为香港是一个正常的民主社会......若不能掌握港人经历这几年的政治冲击而已出现的思维进化,那只会作出错误的判断。"讲到咁?莫非暗地承认自己只系假民主?

要数反对初选嘅揽炒派,街工嘅白头佬(梁耀忠)先系典范,因为佢上周已喺记者会讲明,每个人都有参选同被选权,所以即使街工喺初选输咗,都会照样宣布正式参选立法会,激到戴妖同"民主动力"唔畀街工玩初选

讲到底,戴妖只系想踢走啲唔听自己支笛嘅"同路人",永保自己操控揽炒派嘅权力,好似想参选教育界嘅北区区议员蒋旻正咁,佢日前同戴妖表达参选意向,点知戴妖就话因为教协唔参加初选,所以初选就唔包教育界喎。听到戴妖咁讲,唔怪得一班"素人"同"本土派"都觉得佢系"民主派"嘅大台啦。

亲热狗嘅"手作达人"吴斯翘(Billie Ng)就引述数据问:"截至6月26日下午4时30分,参与支持初选的人数只得61,995人(占全港选民几分之几?),为什么戴教授你觉得你的初选有认受性?""William Lau"亦揶揄:"有口杯葛街工梁耀忠,但我睇到呢个所谓初选有更多个梁耀忠喎!"

来源:文汇报