首页 > 新闻 > 香港 > 正文

屠龙爆"内鬼"? 连登仔"公投"扮伟大

捉"鬼"系"黄丝"最爱嘅行为之一。今次嘅"鬼"来自近排被指"转行屠银包"嘅"屠龙小队"。有人喺连登爆料自己掌握证据,"屠龙小队"有成员为咗自己减刑帮警方做针,而呢啲针仲唔只一个。无法面对呢个惨淡真相嘅"黄丝"整咗个"公投",问喺同样情况下大家嘅选择,结果当然一片祥和。但就有唔少人根本唔相信连登仔臆想出来嘅"理想国",揶揄都好想睇下连登仔系咪真系咁伟大。

话说"灰你老母"呢两日喺连登出post,指"『屠龙小队』有内鬼,(被笃灰嘅人)当中涉及大量甲级重犯,包括三名被『送中』港人"。佢所指嘅"内鬼"正系"屠龙小队"李家田,佢话所有被捕"手足"都要求公开,等大家知道究竟系边个害死自己人。

佢列出自称"一个受牵连既(嘅)人"提供嘅李家田笃灰"证据"同"时间表",称李家田喺西贡试枪事件后被警方跟踪,为自保换取减刑同警方deal并于11月中开始帮警方做针,当时佢仲未被捕,做到12月8日,导致全team手足被捕,当中包括甲级重犯,全部被控串谋意图伤人(判12年以上至终身监禁),案件亦涉及3名"送中手足",但李家田只被控一项无牌管有枪械或弹药罪,最多坐4年。

"一个受牵连既(嘅)人"就话自己查咗好耐,"好多系一手资料,有家属、有李家田同学以及受害者"提供资料,上面中仲列埋笃灰细节,而佢所列出嘅11个被捕嘅人中,除咗李家田,仲有另外两个都系"鬼"。

连登"公投"显键盘侠"英勇"

呢次捉"鬼"似乎打击到"黄丝"脆弱嘅心理防线,于是有人喺连登整咗个"公投":"你比(畀)警察拉左(咗),而且系甲级重犯,坐监12年起跳,但如果你肯做警察针笃灰,刑期由12年减到4年。出卖队友:自己坐4年,其他人都会坐,但唔知几耐;唔出卖队友:自己坐12年,其他人出面如常生活。"

虽然面对自己生定"手足""死"嘅灵魂选择时,有人已经用行动给出咗答案,但键盘侠都仍然"英勇",大部分都称自己会"唔出卖"。"新小白Pedri"好似演员上身咁话"出得去预左(咗)死,二五地活着(着),你呢世都唔会过到自己果(嗰)关,预期7老80先黎(嚟)系(喺)病床怪自己。"佢仲话要自己"拎刀插死一两个警察",然后"比(畀)人开枪打死"。"食开两支烟"就揶揄佢:"用键盘打?"

"发梦都很顾虑"话:"根本发生系(喺)自己身上个个都会拣笃灰。""无助的人"就讲咗句真话:"我自问都会咁做......我就好想睇下连登仔系咪真系咁伟大。""孤独的尾行家"都话:"大家最后都系现实,理想只是一时冲动。""回到过去好吗"就耻笑"12(11)个有3个变节,从来都话猪队友比敌人更可怕。""你认真就输了"都唸咗一招:"出卖就可以减刑,大家都出卖左(咗)先,反正『义士』都有觉悟,唔会怪你。"

来源:文汇报