首页 > 新闻 > 香港 > 正文

"饭民"悲情牌失效 网民翻旧账互数

传统"饭民"终于成功自行揽炒,同DQ4綑绑住消失于立法会。传统"饭民"以为自己嘅举动好"悲情",会令佢哋得到好多民意支持,但实际上好多"抗争派"不断耻笑佢哋抵死。传统"饭民"抵唔住颈闹返转头,结果互揭对方臭史:"饭民"闹"抗争派"未瞓醒,唔记得晒"饭民"曾经声援"抗争派","抗争派"就贴埋新闻重揭"饭民"当年企图抢"抗争派"议席,真系派到成地花生呀。

搬梁游闹"饭民"割席

传统"饭民"用"闹辞"将自己塑造成悲情人物,但喺各怀鬼胎嘅揽炒派阵营,又边有咁易。前"香港众志"秘书长黄之锋就借住讲点做文宣出post,话4年前好多人觉得"本土派"抵死,今日就觉得"DQ4"抵死,又话当年被DQ嘅梁颂恒同游蕙贞"缺乏民主派支援"、被怀疑系鬼,再踩多脚先入正题话︰"就算有人觉得政客呢刻食相真系难睇,未来几星期我地(哋)都急需要一套抗衡『蓝丝』动员的文宣工作。"

黄之锋呢番句句有骨嘅说话,都刺痛咗一直力撑"饭民"嘅"香港民意研究所"副行政总裁锺剑华对眼,锺剑华愤而留言︰"真系枉费咁多『民主派』政党及议员长期对你咁支持及保护!"

睇怕锺剑华都要嬲好多人。前"大专国际事务代表团"发言人张崑阳亦话如果当年传统"饭民"唔同梁游割席,"过去派系间的隔膜会否少了点。"

借梁天琦揶揄杨岳桥

网民"翼双飞"就数埋"独人"梁天琦笔数落去,话"DQ4"之一嘅杨岳桥俾人笑得最犀利系有原因嘅,事关2016年立法会新界东补选,杨岳桥赢咗梁天琦,"如果(梁天琦)佢当选,佢就系第一个因暴动罪入狱六年嘅香港立法会议员,成日讲话要国际曝光,呢个曝光系咪有用过你杨岳桥多多声?"外号"黑人"嘅"Takki Ma"亦揶揄杨岳桥︰"笑佢都费事,追薪津再话我知。"网民"希布"都话︰"传统『饭民』今时今日咁,全部都自己攞黎(嚟)。"

不过,传统"饭民"都有自己支持者。网民"David Chan"就话传统"饭民"从来都冇讲过同意DQ梁游,又话"抗争派"今日所讲嘅"割席",只系传统"饭民"中有人表达过唔同意梁游嘅言行喎。之后就话"饭民"曾经帮梁游开路宣誓、曾经搞黑衣游行反DQ,质疑张崑阳同黄之锋"当刻系打紧机定未瞓醒"。

佢有佢牙尖嘴利,"抗争派"早就储咗一堆罪证准备随时贴堂鞭尸。其中,当年被称为游蕙祯"Plan B"嘅袁健恩就喺fb贴咗当年袁海文想抢游蕙祯俾人DQ个位嘅新闻出嚟,当时袁海文话"睇唔到要畀返青政"喎,袁健恩反问︰"你都唔觉自己错,咁有咩好讲?根本大家由对现实嘅理解到立场取态都唔同,仲有咩好倾好团结?"

来源:文汇报