首页 > 新闻 > 香港 > 正文

"黄丝"只准杜狗食"蓝店" 不许虫泰食美心

■鄭錦滿揶揄杜汶澤食KFC係幫襯「藍店」。 鄭錦滿fb截圖

■郑锦满揶揄杜汶泽食KFC系帮衬"蓝店"。 郑锦满fb截图

如果要数"黄丝"嘅双重标准,真系日日有新闻。话说"热血公民"立法会议员郑松泰(虫泰)日前对住美心生日蛋糕影许愿相,即刻俾"黄丝"闹佢对唔住"手足",可能"热狗"副主席郑锦满一直"嬲嬲猪",噚日终于忍唔住喺fb发帖反击,贴出成日帮"黄店"卖广告嘅"黄丝伪人"杜汶泽食KFC炸鸡嘅相,"热狗"仲留言大闹﹕"祗(只)许『杜狗』食怡和,不准『热狗』食美心!"呢类帖子一出,就立即俾"黄丝"反问:"佢系艺员,你系政治人物,边个先应该分清政治立场?"

揽炒派成日教"黄丝"乜嘢都要政治化,连食餐饭都要分颜色,搞所谓"黄色经济圈"。"黄丝"就因为美心集团创办人长女伍淑清去年撑警反黑暴嘅言论而要罢食,而持有美心一半股权嘅牛奶公司母公司怡和集团,旗下嘅KFC亦被揽炒派标签成"蓝店"。

郑锦满护主被围插

郑锦满日前特登贴返杜汶泽食KFC炸鸡嘅相,虽然就冇明言话系想帮"虫泰"洗底,但班"黄丝"见佢趷起条尾,都明佢系想以此护主。"Angus Ip"就闹郑锦满:"自己on ××食美心,见人食kfc就即post黎(嚟)沟淡件事,你×唔××d,佢系艺员,你系政治人物,边个先应该分清政治立场!"郑锦满就死撑:"沟淡?我冇讲『黄』『蓝』喎,你唔好对号入座啦!"

见郑锦满都俾人爆粗闹,唔少"热狗"就出嚟护主,闹返班"黄丝"双标。"海意翔"咁话:"『黄丝』只系会批斗『热狗』,佢哋眼中嘅『政治明星』就做乜都得的,『热狗』食美心,鬼!政治明星食KFC, 『热狗』批斗,『热狗』鬼!『热狗』发动『总辞』,但『泛民』唔走,『热狗』鬼!『泛民』发动『总辞』,但『热狗』唔走,『热狗』鬼......我系批斗『黄丝』个脑。""Rick Sanchez"就话:"得啦,总知《苹果》卖明日大屿广告,『黄丝』食『蓝店』、淘宝、玩抖音、支持差佬捉市民无戴口罩,都系『黄』到金㗎啦,『热狗』食美心蛋糕罪大恶极。""Anodize Chau"则话:"赚『黄尸』钱帮衬『篮(蓝)店』,只准『黄尸(丝)』偶象(像)食KFC,不准『热狗』郑松泰食美心,真系香港『企硬』生态模式啦!"

有唔少"手足"就话对杜汶泽好失望。好似"Maxim Chang"话佢:"做完show即刻食『蓝店』。""Sam Chan"都话:"估唔到杜汶泽系『蓝丝』,我要退出呢个群组。""Trixia Pat"就慨叹:"好食是『良知』!"

来源:文汇报