首页 > 新闻 > 香港 > 正文

"光时"认衰求"箍煲" "黄丝"睇淡无人理

●"光时"发起人喺讨论区出声明道歉。连登截图

自称为"良心"网购平台嘅"光时",早前被踢爆有主管肥上瘦下,每个月出粮袋十万蚊不特止,仲有几个部门主管一齐同流合污,令一班"手足"无得接受培训之余,又无工开。"光时"当时就激到一班"黄丝"发起罢买行动,仲闹爆佢食人血馒头。可能见自己无咗一班"黄丝"科水,生意愈嚟愈差,"光时"发起人噚日就喺讨论区发表题为"光时于2021年重新出发,重拾初衷!"嘅文章,试图凼返班"黄丝"继续撑自己,但效果就充分展现出乜嘢叫自取其辱嘞。

旧人肥上瘦下 称已换管理层

自称系"光时"发起人嘅网民"兜风去吹风"噚日就喺连登出post,话要向所有"同路人"致歉,令大家对"光时"失望喎。佢话经过两个月嘅时间,已经将问题解决,新管理层会更加公开同透明,会畀大家知道佢哋嘅营运情况同帮到几多"同路人"。佢亦声称,新管理层"初心无变,会坚持到底",仲口响响话"悭自己、唔悭手足"、"资源永远先留比(畀)手足"。

不过,一班"黄丝"似乎唔多收货,认为"光时"发起人讲嘢模棱两可,根本无仔细交代跟进方法。有网民就质疑所谓嘅"新管理层"系乜人,但发起人就避而不谈,更有人嘲笑"黄色经济圈"真系专搵"同路人"嚟呃。

网民睇穿呃课金图谋

"Haul-away"就话"我帮衬其他『黄店』好过,『光时』永不再用。""西湾河屠夫"话"出呢个post都系想大家货(课)金,可能之前出粮已经使晒(晒)笔钱。""五毛pr狗有限公司"话"成个黄色都系水鱼圈啦"。

睇返"光时"发起人一年前话要建立生活购物平台,令社运自给自足,当时大量"黄丝"留言力撑,话个个月都会帮衬,声势浩大。点谂到一年后"光时"落得如斯下场,真系再一次话畀大家知,所谓"黄色经济圈",真系一个笑话。

来源:文汇报