首页 > 新闻 > 香港 > 正文

李卓人离谱改车 网民促运署做嘢

●货车车顶僭建晒围栏大声公、海报等布置。 政治大婶判fb专页截图

"民间人权阵线"日前喺荔枝角收押所举行所谓"释放政治犯"车巡行动,"支联会"李卓人、"民阵"召集人陈皓桓同中西区区议员叶锦龙,齐齐企喺货车车顶上嗌咪,但就俾人质疑架车车顶僭建咗围栏,属于非法改装车辆,要求运输署尽快做嘢。

车顶僭建围栏摆大声公

系人都知道改装车辆系违法行为,但佢哋竟然够胆罔顾道路安全,将架货车改到离晒谱。由fb专页"政治大婶判"发帖嘅相可以睇到,3人所处嘅货车车顶僭建晒围栏,仲加埋大声公、海报等布置。睇返"民阵"自己上载啲相,似乎都见唔到佢哋架车嘅"全相",唔通佢哋自己都知身有屎?

一众网民见到佢哋将架车改装到咁离谱,个个都闹爆呀!"Leung Teddy"话:"告番(返)几张告票先,以我小市民嘅理解最少有非法改装车辆、危险驾驶、冇扣安全带、冇第三保。""Alice Wong"就好激气咁话:"拉人拖车啦唔该!搞乱社会秩序嘅败类,咪又喺(系)为左(咗)钱,众筹呀!课金呀!""pang chan"亦话:"警方点解唔告佢非法改装车辆?"亦有人揶揄佢哋,久唔久出嚟刷存在感,咪又系想凼人捐钱、搞众筹。

唔理佢哋目的系咩,整架咁嘅车出嚟危害道路安全就系唔啱!提提大家喇,为有效遏止违规改装车辆,维护路面行车安全,记得善用 1823 举报,又或者填妥"有缺点车辆举报表格",一齐打击非法分子。

来源:文汇报