首页 > 新闻 > 香港 > 正文

三逃犯大啖血馒 乞"制裁"抢光环

揽炒派成日挂喺口边嘅一句"兄弟爬山,各自努力",原来真系一个好使好用嘅"万能Key"。正当留港揽炒派一再讲到自己几咁无辜,将无差别否决政府议案都讲成系想履行职责时,那边走咗佬去外国嘅揽炒派就扑出嚟抢光环,前晚巧立名目咁出咗个"流亡民主派初选参选人声明",话香港特区政府"打压""政治检控",仲叫外国要即刻制裁相关官员喎。咁样将外国势力同在港揽炒派挂钩,唔知系咪想送佢哋一程呢?

揽炒派真系好识出嚟抢光环㗎,联署嗰个所谓"声明"嘅3个人,一个系大话连篇嘅民主党前成员许智峯、一个系冇乜人识嘅前"民间外交网络"发言人张崑阳、一个就系明明旧年7月初自己退出"初选"赶住走佬嘅罗冠聪,转下眼又可以用返"流亡民主派初选参选人"嚟发声明,真系不得不佩服佢哋巧立名目嘅心思。

"齐上齐落难听过粗口"

虽然有揽炒派支持者就默默为呢3个冇穿冇烂嘅人打气,但亦有网民留言耻笑佢哋。"邓佩佩"喺许智峯度留言话︰"你就衰格啦,又话齐上齐落台不怕牺牲,原来系咁×街走佬呀?""Man Wai"亦贴出"齐上齐落比粗口更难听"嘅图片话︰"麻烦阁下唔好再嚟呢套啦……"

佢哋3个人喺"声明"仲话会继续喺海外"持续发声",真系唔知佢哋班"战友"望住呢3个人会唔会眼红呢。有唔少网民睇穿事实,都纷纷留言揶揄佢哋,就好似"张工"揶揄佢哋"闪得快好世界","Fai Wang Szeto"更大闹3人"逃亡犬身有×,畏罪潜逃,冇×用"。

对呢3个人借呢件事炒作,又叫外国"制裁","Lu Wenhui"就耻笑佢哋︰"太高估自己实力了,流亡在外的丧家之犬,谁会来理你呢?"

呢份"声明"真系完全体现出揽炒派当初所讲嘅"齐上齐落"根本系个大话,事实就系"你有事,我走佬",大难临头梗系各自飞嘞!

来源:文汇报