首页 > 新闻 > 香港 > 正文

拖手足粮3个月 黄店"和你送"卷款潜逃

星岛环球网消息:文汇网讯 黄店成日花式呃"手足"。世上最无良嘅老板唔系唔出粮畀员工,而系唔出粮之余老板仲要人间蒸发。讲紧嘅系揽炒派劳工团体"劳工组"前日喺facebook发帖曝光嘅一件事。话说佢哋最近收到一单极离谱嘅求职骗局,一间帮人送件嘅"黄色"快递平台"和你送"老板都从来冇同任何"手足"员工有过直接接触,仲要不断用拖字诀同埋各种借口拖"手足"成3个月粮。"手足"点催都无影,最后间黄速递平台更人间蒸发,连社交平台都删埋,激到班"手足""扎扎跳"。不过,鬼叫佢哋人一黄,脑死亡,个平台之前咁多疑点摆明有伏,都仲要帮佢哋卖命,

"黄色经济圈"最多系咩?唔系钱,系伏。最新一集嘅求职骗局主角系"和你送"速递。佢哋声称系一班"热爱香港嘅手足"搞嘅平台,卖点系如果市民唔想用"红店"顺丰或邮局,"和你送"就会以"步兵"、货Van等形式亲自送货到目的地。

据"劳工组"引述苦主"手足"表示,早喺今年1月初,由于"手足"傻更更地抱住个信字,喺"黄色"招聘平台搵到"和你送"并入职,原本满心欢喜以为搵到工,点知"我本将心向明月,奈何明月照沟渠",原来一切都系伏。

话有客服但长期已读不回

一开始"和你送"声称14天就会出一次粮,但14天之后又话要等多几日,不断无限拖,每次都有唔同借口,"试过话票未收齐、转数快坏左(咗)、转数快限额爆左(咗)冇得转,要第二日、又话未计完数、又话老板喺外国等等。"最后就咁拖咗差不多3个月,而成间公司唯一一个可以搵到老板真身嘅客服亦长期已读不回,甚至不读不回,回嘅就系上面堆"理由",苦主"手足"称:"完全收唔到钱!就算同客服讲要找卡数、交租都冇理过。"

"劳工组"就话,呢间"和你送"系用"件计"嘅方式造成假自僱关系,逃避僱主责任,可以称得上系一个零成本嘅运作模式,全部风险都转嫁畀员工。同时,"手足"唯一会接触到就系公司客服派单嘅人,只有佢先联络到老板,加上佢哋平时一直只用通讯软件沟通同埋发布工作,隔绝咗任何同事与老板嘅直接接触。

一切都显得非常怪异,而更加诡异嘅系间"和你送"已经删除咗多个社交平台账号,死无对证,真系得个冤字。

"劳工组"就怀疑个客服就系走数嘅老板,仲话如果唔系,就希望佢上水,一齐追数。佢哋呼吁"手足"睇路,叫大家杯葛"和你送",闹佢哋"以黄『手足』名义搵生意,假自僱,玩拖粮,老板失踪",呼吁知情者、受害人提供各种方法搵到个老板真身。

围内抽完水 继续滚塘鱼

唔少网民都质疑究竟香港人几时先会醒。"Benny To"问:"究竟香港人几时先肯面对现实,就系『黄圈』入面一样有搵人笨、剥削人既(嘅)×街老板。讲真话又闹人分化,咁继续开心咁做猪啦!反正咁多人俾佢搵笨,个老板开心赚到笑啦!""肖建邦"表示:"事实上有好多所谓黄店系搵笨×。""David Ng"认为:"努力工作,为了生活,公司唔肯出粮,耍太极,无资格做黄店,公司必须要回水,尽企业责任。""梁梓圆"指:"什么理念都好,于香港最终都会变成短炒项目;而且食相很难看。"

成日标榜所谓"齐上齐落"嘅黄圈,实质上更识得乜叫"齐齐抽水"。

同为"和你"系列嘅"和你车"见到"和你送"濑嘢就立马喺facebook发帖话:"拿(嗱),我地(哋)速递系叫和你派唔系和你送,咪搞错呀。BTW,血汗钱都呃真系不得好死嫁。"