首页 > 新闻 > 香港 > 正文

黄团售凤梨图利 黄丝变水鱼都唔知

●网民指"西贡青年舍"卖台湾凤梨食尽人血馒头。 "正视 2.0"fb截图

早前"台湾凤梨"被禁止输入内地,有唔少"黄店"同组织就以高价出售"台湾凤梨",美其名呼吁班"手足"支持台湾农民,但实际上就系想从中赚返笔。不过,成班黄丝又点会用脑分析吖,佢哋一心以为大家系"同路人"就一条心,信到啲"黄店"十足十,结果做咗水鱼都唔知,真系蠢到加零一。

话说日前"西贡青年舍"喺fb宣传预购"台湾凤梨",标明每个价值30蚊,而一箱5粒至8粒就卖190蚊。为咗凼班黄丝帮衬,佢哋就话:"3月系『台湾凤梨』嘅收成期,一句话唔要就搞到台农企咗喺度,有香港人无咁易!"佢哋仲强调:"是次团购纯义务性质,不赚分文,只限街坊订购自用,谢绝转售图利。"

之但系一个凤梨卖成30蚊,明眼人睇落似乎有啲唔合理喎。fb专页"正视2.0"就图文并茂咁踢爆佢话:"好似今日,又有台湾凤梨搵你『扮贼』嘅case,食尽人血馒头,明明街市买个凤梨先25蚊个,揾(搵)你买仲要30蚊个,真系攞你命,一箱数埋都9粒,随时可能仲畀你抽埋水。"睇真啲,"西贡青年舍"同街市所卖嘅一样系"台湾金钻凤梨",因乜解究佢哋会卖贵啲呢?唔通就系因为有"黄"背景嘅加持?

对于"西贡青年舍"卖"台湾凤梨"一事,"ChiChi Angel"就质疑:"果栏先20蚊个,抽晒水。""Doris Tai"就话:"等佢哋自己人呃自己人都好,总好过破坏社会。"

网民讥"佢哋都系只猪"

"Woody Lam"就"苦口婆心"咁讲:"佢地(哋)心甘情愿比(俾)人呃、明知比(俾)人呃都要去,咁做咩阻止佢呢?"而"Eva Cin"就揶揄话:"所以佢地(哋)个logo都系一只猪。"

学"正视2.0"话斋,咩都挂个颜色出嚟就赚到钱,真系易过借火,难怪"黄色经济圈"会俾人叫做"黄色水鱼圈"啦!

来源:文汇报